كەزدەسۋ بارىسىندا ەكىجاقتى عىلىمي ىنتىماقتاستىقتىڭ جاڭا كوكجيەكتەرىن اشاتىن ىنتىماقتاستىق تۋرالى مەموراندۋمعا قول قويىلدى. قۇجات كەڭ اۋقىمدى باعىتتاردى قامتيدى: عالىمدار الماسۋ, بىرلەسكەن زەرتتەۋلەر جۇرگىزۋ, قىسقا مەرزىمدى ساپارلار ۇيىمداستىرۋ, بىرلەسكەن جاريالانىمدار شىعارۋ, زەرتتەۋ جەلىلەرىن قۇرۋ, يننوۆاتسيالىق ازىرلەمەلەردى ىلگەرىلەتۋ, سونداي-اق ەتنولوگيا مەن تاريح سالالارىنداعى بىرلەسكەن باستامالار.
ۇلتتىق عىلىم اكادەمياسىنىڭ پرەزيدەنتى اقىلبەك اقىلبەك كۇرىشباەۆ ءوزىنىڭ قۇتتىقتاۋ سوزىندە 1946 جىلى ۇلى قازاق عالىمى قانىش ساتباەۆتىڭ باستاماسىمەن قۇرىلعان اكادەميا بۇگىندە ەلىمىزدىڭ ينتەللەكتۋالدىق ورتالىعى بولىپ تابىلاتىنىن اتاپ ءوتتى. 2024 جىلعى جەلتوقساندا اكادەميا قازاقستاننىڭ جوعارى عىلىمي ۇيىم مارتەبەسىنە يە بولىپ, ۇلتتىق عىلىم, تەحنولوگيا جانە يننوۆاتسيانى دامىتۋ جۇيەسىندەگى ماڭىزدى ءرولىن تاعى دا ايقىندادى.
«اكادەميا ميسسياسى — عىلىمي پروگرەستىڭ فلاگمانى بولىپ, مەملەكەتتىڭ ستراتەگيالىق باسىمدىقتارىن قالىپتاستىرۋ جانە ىسكە اسىرۋ, عىلىم, ءبىلىم مەن ءوندىرىستى بىرىكتىرۋ ارقىلى قازاقستاننىڭ عىلىمي-تەحنولوگيالىق ەگەمەندىگىن قامتاماسىز ەتۋ», — دەپ اتاپ ءوتتى ا.كۇرىشباەۆ. سونداي-اق XXI عاسىردا عىلىم شەكارا تانىمايتىنىن, ال ونىڭ جەتىستىگى ىنتىماقتاستىققا, تاجىريبە الماسۋعا جانە جاھاندىق سىن-قاتەرلەرگە بىرلەسكەن شەشىمدەر تابۋعا قابىلەتتىلىكپەن انىقتالاتىنىن ايتتى.
تاراپتار ايقىنداعان نەگىزگى ىنتىماقتاستىق باعىتتارىنا مىنالار كىرەدى: اگرارلىق سەكتورداعى بىرلەسكەن زەرتتەۋلەر مەن جوبالار, جاساندى ينتەللەكت قولدانىلاتىن «اقىلدى» اۋىل شارۋاشىلىعىن دامىتۋ, كليماتتىڭ وزگەرۋىمەن كۇرەس جانە گيدروتەحنيكالىق ينفراقۇرىلىمدى دامىتۋ, جاڭا سورتتار مەن تۇقىمداردى سەلەكتسيالاۋ, جاڭارتىلاتىن ەنەرگەتيكا, مينەرالدار ءوندىرۋ, كۆانتتىق تەحنولوگيالار, كيبەرقاۋىپسىزدىك, سونداي-اق ەتنولوگيا, ارحەولوگيا جانە تاريح سالاسىنداعى زەرتتەۋ باستامالارى.
پولشا عىلىم اكادەمياسى — 1952 جىلى قۇرىلعان پولشاداعى ەڭ ءىرى عىلىمي مەكەمە, ول 70-تەن استام ينستيتۋت پەن عىلىمي ورتالىقتى بىرىكتىرەدى. اكادەميا عىلىم مەن حالىقارالىق ىنتىماقتاستىقتى دامىتۋدا ماڭىزدى ءرول اتقارادى, ونىڭ پرەزيدەنتى, پروفەسسور مارەك كونارجەۆسكي — حالىقارالىق عىلىمي جوبالاردا ۇلكەن تاجىريبەسى بار تانىمال عالىم.
ءوز سوزىندە پروفەسسور كونارجەۆسكي پولشا تاراپىنان بىرلەسكەن زەرتتەۋ جوبالارىن, ءبىلىم بەرۋ تاعىلىمدامالارىن جانە الماسۋ باعدارلامالارىن جۇزەگە اسىرۋعا دايىن ەكەنىن, ونىڭ ىشىندە تۇراقتى دامۋ, ەكولوگيا, يننوۆاتسيالىق تەحنولوگيالار جانە مادەني مۇرانى ساقتاۋ باعىتتارىن قامتيتىنىن اتاپ ءوتتى.
پولشا دەلەگاتسياسى ش.ءۋاليحانوۆ اتىنداعى تاريح جانە ەتنولوگيا ينستيتۋتى, ءا.مارعۇلان اتىنداعى ارحەولوگيا ينستيتۋتى, ق.ساتباەۆ اتىنداعى گەولوگيالىق عىلىمدار ينستيتۋتى, بوتانيكا جانە فيتوينترودۋكتسيا ينستيتۋتى جانە قازاقستان رەسپۋبليكاسىنىڭ ورتالىق مەملەكەتتىك مۋزەيىنىڭ جۇمىسىمەن تانىستى.
پعا دەلەگاتسياسى قۇرامىندا: پروفەسسور مارەك كونارجەۆسكي (پان پرەزيدەنتى), پروفەسسور اركاديۋش نوۆاك (پوۆسيندەگى بوتانيكالىق باق ديرەكتورى), پروفەسسور ياروسلاۆ ستولارسكي (پالەوبيولوگيا ينستيتۋتىنىڭ ديرەكتورى), پروفەسسور اننا ۆىسوتسكايا (گەولوگيالىق عىلىمدار ينستيتۋتى ديرەكتورىنىڭ عىلىمي جۇمىستار جونىندەگى ورىنباسارى), دوكتور كاتاجينا كوشچ-رىجكو (ارحەولوگيا جانە ەتنولوگيا ينستيتۋتى), دوكتور اننا پلاتەر-زيبەرك (حالىقارالىق ىنتىماقتاستىق بيۋروسىنىڭ ديرەكتورى), پولشانىڭ الماتىداعى ەلشىلىگىنىڭ باس كونسۋلى داريۋش شەۆچىك مىرزا بار.
بۇل كەزدەسۋ قازاقستان مەن پولشا اراسىنداعى عىلىمي جانە مادەني ىنتىماقتاستىقتى نىعايتۋدىڭ ماڭىزدى قادامى بولىپ تابىلادى, ول الداعى ۋاقىتتا بىرلەسكەن جۇمىس پەن ءوزارا جوبالاردى دامىتۋعا جاڭا مۇمكىندىكتەر اشادى.قول قويىلعان كەلىسىم عىلىمي قوعامداستىققا عانا ەمەس, كەڭ قوعامعا دا ەلەۋلى ناتيجەلەر اكەلەتىن ەكىجاقتى باستامالاردىڭ دامۋىنا قۋاتتى سەرپىن بەرەدى.
الماتى
